Ko Panguru ko Papata ko te rākau tūpatapata i tū ki te Hauāuru

Ko Ruarei Ko Raparapa ngā uri i Wharewhare ki te rangi

Tū te rā, Tū te pō

Tīhei Mauri Ora!

Nō ngā pito maha tēnei o Te Rarawa, Ngāti Kuri, Tūwharetoa, Tainui e mihi ana.

Tata iwa tau kua tū au hei kaiako ki rō ngā kura tuatahi o te rūmaki, kura kaupapa, anō hoki te whakahaere i te reo me ōna tikanga ki rō ngā kura auraki.

Ko taku taha māmā e poipoi ana i ēnei tamariki, heoi, ko taku taha auaha, taha mōhio ki te ao matihiko, taha mātau ki te ao tūroa, taha mārama ki ngā mahi o te rēhia e whakaputa ana ngā hua mā ēnei iti kia tupu.

I runga i te karanga o ngā whānau, nōku te whiwhi hei kaihautū mā rātou, te rūmaki reo o whānau Ata ki Waiatarau.

Ko te hā o kui te hoe o tēnei waka, kia rere, kia Māori te reo ki rō ngā uri whakaheke. Tau ana!